Nulingou

Saulės geltuonās varpelēs
Rodėns lapā skomboliou
Kas par vasarelė žielė –
Lek so viejēs pakeliou

Sošlam, sošiošen līg būto
Gīvė padarā laukū
Žemė ėlgės dar rugpjūtė,
Žalė lapa palaikū

Vuortinklē ont stėibo kuorol,
Žuolės soveltās laiškās,
Nutepliuotas darža tuoras
Saulės spindolēs  blīškēs

Stuorė bolvienuojē raituos
Joudūs patalūs minkštā,
Kvep maišelius bolviu kraitis –
Kuošiems ė sriobuoms užteks

Lašėnēs dongou sosliegtė
Tvīruo debesis pėlkė
Nebier kuo gruožietėis, liektė,
Laukā jau vėsor plėkė

Paskotėnės šėltas dėinas
Nešas vasaras guodas
Braižuos apverstas ražėinas
Ežiu šepetēs rodās

Ė lingou par žemė vėsa
Lapā, paukštē, ramoma...
Šėltūs vasaras paviesiūs
Rodėnėnė ruomoma