Kaliedu nakti

Par mėgla, tėršta mėgla
Brend medē, kaima truobas...
Unt ledea, kāp unt stėkla
Viel kluojės snėiga druobės...

Į nuosi skaudē baduos
Viel speiga žėrklės aštrės
Ė šėlomuos neradės
Į vėdo rieblėn Pietris

Ė stujėis pri pat longa
So vėrpolēs par kūna
Dîvuojės kāp par dongo
Be žaiba, be perkūna

Ēt stuoras bangas snėiga —
Kap oudėgas sukiuojės
Nuors anū nieks nedėigė
Ė nieks nekeravuojė...

Ė džiaugas sosėmastės
Ka tor truobelie luova
Ė dounas gal atrastė,
Ka ronkas nusipluovės

Pajims stalini peili,
Atpjaus rūkīta kumpė
Ė atsėsiedės meilē
Žmuonelē sava kumpčiuos

Po biški isėpīlė
Išgers rauduona vyna,
Kalbies maldelė tīlē
Kalieduoms ė gėmtėnē

Vo paskou jau aprėmė
Sukrės i šėlta luova,
Vo Jezusielis gėmės
Tou anū darba šluovins...