Ka nulėjos lītou svėrst jezmėnu šakas
Ė lapelē kotėn balta žėida perlus
Mona jauna šėrdės doudas kāp patrakus
Tarsi krūmu žėidā būtom sieniu derlios
Vo kvepiejėms driekas pagal driegna žuolė
Pasėkielės mėgluom lend i patė gerklė
Liguo būtiuo laukū išrinkta gražuolė
Ė žuolyna kėima nuor muni pagerbtė
Šėltasparnē viejē debesis išstumdė
Ė garā i uora – tarsi vėrtum kava
Par rasuota kėima brend švėisuos pagunda
Rasuos žėborelēs apsivainėkavus
Nuors senatvie akis jau neb tuokės aštrės
Ė žėidīnu spalvas nulingou iš lieta
Driegmė sėrpulinga tuoloma bekraštė
Balta berža ronkuom švelnē pakīlieta
Barbė bėng apsvaigtė nu tuokių gražībiu
Nerēk ni konjaka, ni kavuos poudelė
Ė bijūna stėiba so nagās nugnībus
Glaud pri raukšlės žonda kāp jauna mergelė