Aple savi

Eso aš muosiediškis
Ė augau pri pat kelė
Kor vakarā nublyškė
Jausmū vėsuokiu kielė

Aplink nomā miestelė,
Vėišnynā, vuobėlynā
Ė žmuonis geravalē
Gėrkšnuojė rausva vyna...

Netuolėj bieg opielis
Ons Bartovo vadėnas
Koriuo karklynus šiela
Paukštelē ė ondėnės

Ka liuob lakštingalelės
Pavasarėnem guojie
Nusivingious gėismelė
Kūjousem nemėiguojė...

Ėiškuosi dėina nakti
Ė šiuo, ė auo gatvie
Ka kas padieto plaktė
Tou ilgesi vėinatvės...

Vo kol vākā da bovuom
Į opi tonkē ejuom
Į žalėmas sogriovė
Būt dėdėlēs žadiejuom

Ka liuob parkaitė šuona
Iškeptė saulės karštie
Į ondėni geltuona
Sokrėsem pasėtorkštė...

Vo kartās kiaura dėina
Gainiuosem kuokė žuvi
Gerā, je da ne vėina —
Ė diesem i keptovė...

Ė nimaž nenotokė
Malšinsem pėlva alki
Dounelės tonkē trūka
Ė būsem maž kuo valgė...

Bet vėstėik gerā bova —
Vėskas į krūva diejuos
Kas sau linksmā darbavuos
Ė dainas vėn gėrdiejuos...