Žėimuos gražoms

Pavartau paveiksla vėn kėtuokio kampo –
Veizous aš i berža šaka kor nurėma,
Kor i noma sėinas piešini iklimpa
Retās ė tonkesnēs gruožė atradėmās.

Pusnis nugrieblioutas baltomuos minkštomās,
Berža apkabėna, ilinkėmus kuota,
Pėlkous tuoliu mėglas apšvėistas ė tomės,
Devīnaukštiu kubas platē apdieliuotas.

Medius, nomū sėinas snėigā vėn pabarsta –
Kor berželė šuoki, nuostabiausi džiaza,
Ė dongaus keporė kāp siuvies privarsta
Pri pūguos suvelta lekonti peizaža.

Paukštē sokas, draikuos, sparnus sukrīžiavė –
Brauk par minkšta snėiga šerpetouta driūžė,
Ė pri balta berža lėimėnelė kriava
Elsie viejė šuorā i nomus sodožė.